غير حجم خط المدونة
+ + + + +

الجمعة، سبتمبر 16، 2011

"حـــلْها فــي الطـــالب الــصـــيني"

-----------------------------------
التعليم هو أحد الركائز الأساسية لبناء الأمم، هكذا بدأ كلامي وهكذا سيتنهي...
التعليم في مصر... محتاجين نحط ألف خط تحت كلمة التعليم وخصوصاً في مصر...التعليم ومشكلات التعليم والنهوض بالتعليم وبناء آفاق جديدة في التعليم، كلها مواضيع متشابكة ومحتاجة تركيز ، نبدأ منين مش ده المهم المهم هنوصل لفين....
بدايةً كده... التعليم في مصر بيواجه مشكلات كتيرة جداً وللأسف  رغم المحاولات اللي بنعملها وبنسعى لتحقيقها إلا أنه المشكلات زي ماهي موجودة ويمكن بتزيد يوم عن يوم..
و يالا سخرية القدر أما يكون مستوى التعليم في مصر متدني بالشكل ده رغم أننا بلد الأهرامات والفراعنة!!! نفسي يلاقوا حاجة غير الأهرامات والفراعنة يتكلموا عنها لكن للأسف الفراعنة بالنسبة لنا هم كل شيئ رغم أنه كان في مراحل نهضة من العلماءالمسلمين وحتى في عصر محمد على باشا وما بعده من تطورات ....
المهم...التعليم في الوقت الحالي بيواجه مشكلات يمكن نكون إحنا كأفراد في المجتمع ومن ضمن منظومة التعليم لينا يد فيها..
وهي كثافة الفصول اللي للأسف أغلب مدارسنا بقت بتواجهها وبرضو مافيش حل ومهما كْتروا عدد الفصول لسة الكثافة موجودة، كل يوم بيزيد طالب في الفصل كل يوم ناس جديدة بتدخل في دائرة التعليم والأماكن زي ماهي...
نيجي لمشكلة تدني مستوى الشرح وطرق التدريس اللي بيتبعها المدرسين.... مش كلهم بيراعوا ربنا في شغلهم ومش كلهم بيقولوا اللي عندهم  ... كله بيدور على سبوبة الدروس الخصوصية واستخدام أسلوب التهديد والوعيد بدرجات أعمال السنة لو مخدتش درس عند فلان الفلاني  وملف الإنجاز اللي أصبح ملف تعجيز مش ملف ينمي عند الطالب حب المواد اللي بيدرسها لأ بيحس انه محاط بمجموعة من الحاجات صعبة التنفيذ وكل ده بيصب في الآخر في مصلحة الدروس الخصوصية واللي بتصب في النهاية في جيب المدرس!!..
ونلاقي مش بس كده ، لأ كمان بيقولولك اهتموا بالتكنولوجيا!!!... نفسي ألاقي مدرسة بتطبق مفهوم التكنولوجيا واستخدامها في التعليم على أكمل وجه، وأنا هنا بتكلم عن المدارس الحكومية وبعض المدارس الخاصة، بقت ثقافتنا ادفع اكتر تجد ما تريد!!!!
بقينا مش بنتعلم ومبقناش بنروح المدرسة عشان بنقدر قيمة العلم..لأ بنروح مجبرين عشان من الآخر أحنا بلد شهادات مش بلد علم للحياة ،لأ بنتعلم  بس للأمتحان ،وبقصد بكلامي أن دلوقتي الطالب بقى بيذاكر عشان ينجح مش عشان يتعلم حاجة تفيده للزمن واكتساب خبرات حياتية ومعرفية جديدة، لدرجة أحساسي ان دماغ الطالب قربت تصدي!!! من كتر ماهو بيحفظ أكتر ما بيفهم...
مجرد بيحفظ عشان يصب المعلومات في الأمتحان... لايق عليه أنت حافظ مش فاهم...
طرق التدريس فيها مشكلات كتير، حتى تعامل المعلم مع التلاميذ اختلف... الطلاب كمان مبقوش زي زمان، بقا الطالب هو اللي بيدرس للمدرس..!!!
إحساسي بيقول إننا في مرحلة إنهيار بس بالتصوير البطيئ ، إنهيار تعليمي وللأسف النابغين بقوا قلة أوي في بلدنا ولو موجودين بيسافروا يطوروا نفسهم برة...
وعلى النقيض تعالوا نشوف الصيــــن... تخيلوا بلد متأخرة عننا وكنا سابقينها بمراحل.. بقوا هما اللي بيعطفوا علينا بيصدرولنا اللي بيصنعوه وقدرت تتقدم في كل شيئ والسبب كان اعتمادها على العلم اللي هو أساس بناء الأمم.. سبحان مغير الأحوال!
لو جينا نبص للصين كدولة كبيرة وعدد سكانها بيزيد كل يوم ورغم كده متطورة تكنولوجياً .. وعلمياً ،يعني كثافة السكان مش حجة !!
شوفوا الطالب المصري دلوقتي بيحسب بالآله الحاسبة... ولغى دماغه اللي هي عقل بشري قادر على القيام بأغلب العمليات الحسابية واعتمد في الآخر على آله... وتخيل مين اللي عاملاها طالب في نفس سنه بس للأسف صيــــني ، ومش كده بس لأ كمان لما حبينا نرجع للطفل المصري ذكائه الحسابي استوردنا برضو من الصين
" اليــــوســـي مــاث " !
طب بالذمة هو الصيني ده زايد عن المصري في إيه ؟ يمكن عشان عينه ضيقه شويه عشان كده بيركز أكتر مننا!!!
ولا الساعات الصيني والكمبيوترات واغلب الأجهزة الحديثة اللي بنستخدمها جت منين؟ ماهي من الصين... واللي عاملها الطالب الصيني ... الطفل الصيني...
طب عمرك فكرت اشمعنى الصيـــن ؟!؟
اقولك أنا ليه.... لأن الصين رغم الكثافة السكانية العالية جداً اللي تعدتنا بمراحل إلا أنها استغلت الثروة البشرية دي في زيادة إنتاج بلدها.. دخلت التكنولوجيا في حياة أبسط رجل وأمرأة وطفل صيني... بقت حياتهم تعتمد على إستغلال كل شيئ موجود عشان يطوروا بلدهم... تخيل بيستوردوا القمامة اللي أحنا كبلد نامي والبلاد التانية النامية بترميها بيستغلوها في صناعة أشياء جديدة... وفي الآخر بيصدروها لينا
بالذمة ده كلام...!!!
الطالب الصيني من نعومة أظافره بيدخل المدرسة وبيعيش في جو تعليمي متكامل ...من نظافة الفصول، استخدام الانشطة سواء ترفيهية او علمية، تنيمة مهارة الإبتكار والإختراع، أو أو أو .... إلخ
التكنولوجيا ليها دور كبير في تطور التعليم الصيني .. والدول الشرق آسيوية
ليه احنا كبلد بيضرب بيها المثل بإنها بلد الحضارة والعلم.... منبقاش زيهم... عقلهم أزيد مننا في ايه؟
لكننا بقين متواكلين... ده للأسف ابسط تشبيه اقدر اقوله، بقينا عاوزين الحاجة تجلنا على الجهاز من غير ما نتعب وفي الآخر نقول التعليم فاشل والمنظومة التعليمية فاشلة... أكيد في خطأ من كل الأطراف...
بس ليه احنا مندخلش التكنولوجيا بجد في مناهجنا وفي اسلوب شرحنا وفي تطوير مدارسنا...
ليه منستغلش البلاد اللي عندها نهضة تعليمية زي الصين في إننا نستورد منهم خبراء في التعليم عشان يطورولنا تعليمنا مادام أحنا مش قادرين على تطويره... ليه منستغلش طرق التدريس اللي بيتبعوها ونستورد بالمرة مدرسين صينين .. وأهو نتعلم حبة صيني مادام الإنجليزي مش نافع!!
أنا حاسة أننا اللي بنرمي بتعليمنا إلي التهلُكة ومش بس بنجازف بالتعليم، لأ بنجازف بعقول الأجيال الجديدة اللي طالعة... اللي طلعت لقت كمبيوتر وبلاي ستيشن وآي فون صيني ... مش مصري
الأجيال دي دماغها مبقاش فيها غير شوية ألعاب وكورة وتلفزيون وأفلام وانترنت.... مش بيستغلوا كل لحظة وكل مصدر تعليمي في تثقيف نفسهم.. لأن للأسف معندهمش ثقافة علم نفسك وابتكر كل جديد...
أنا حاسة أن الصين بقت متفوقة علينا في كل شيئ وللأسف من لا شيئ....
نفسي أننا نلاقي اللا شيئ ده اللي بيخليهم متقدمين... قبل ما نلاقي الحل في الآخرأننا نستورد طٌلاب صيني عشان تتحل المشكلة ونبقي  بكده صيني في صيني......!!!
و مش عجبي !!
==========


0 التعليقات:

إرسال تعليق

Template by:

Free Blog Templates

;
Source : http://fr3st.blogspot.com/2012/05/add-shareaholic-sassy-bookmarks-to.html#ixzz1vjUMqRHf