غير حجم خط المدونة
+ + + + +

السبت، يناير 19، 2013

الناس الراضين



---------------
الحــياة محتاجة مِننا نحـبها ، لإننا عايشين حياة واحدة بس ، قَدرنا أتولدنا وهو مكتوب علينا ، حياتنا في مِنا اتفرضت عليها طبيعة معينه ، وناس عاشت حياتها زي ما هيّ فكرت فيها ...
نيجي نبص لكل ده هنلاقي إن السعادة في الحياة معادلة بسيطة جداً محتاجة مِننا بس شوية حاجات لو عملناها وعشنا بيها هنحقق المعادلة دي صح...
ومن أهمـ المشاعر اللي محتاجين نحسها بجد وعن إقتناع هي الرضا بالحال ..
 الرضا من أجمل الأحاسيس اللي مش محتاجة مِننا غـير الثقه والإيمان بالله وحُسن الظن فيه ، وإن نشيل الصورة التشاؤمية اللي بنحطها قدام كل ظرف صعب نمر بيه  ..
لو أخدنا مثال على إنسان سعيد، زي البياع البسيط اللي بيفضل طول النهار يسعى على رزقه ، رغم تعبه وقلة قُوتُهْ ،  إلا إن في ملامحه بساطة وسعادة ، وكل ده لإنه راضي باللي ربنا قَسمُه ليه ، عارف إن الخير مهما قل ربنا بيزيده بركه طول ما بنــشكره ..
الرضا إحساس بسيط لكـن أثره كبير بيغير من حالة كل إنسان ، نبص على شخص ناجح وبتقابله صعوبات كتيرة في شغله وبتهدد نجاحه ، لكن بيترسم على وشه ابتسامه بسيطة في كل محنه بيقع فيها ، لإنه راضي من جواه وبيقول الحمد لله على كل حال ..
تـبص لشوية أصحاب جمعت بينهم حالة مرضية معينه ، اتقاسموا مرضهم وتعبهم ، وتيجي تبص لوشوشهم تلاقيها لِسه بتضحك وعندها أمل في ربنا ، وأمل في بُكره ، وكل ده بالرضا ..
لـو كُل إنسان حـاول يزرع الرضا جواه ، مش بس هو اللي هيرتاح ويبدأ في طريقه للسعادة، لأ كمان أهله وبيته وأصحابه وحتى الناس اللي بيقابلهم في الشارع هيحسوا بـده بـ ابتسامه بيرسمها ولو بكلمة شكر ..
هنلاقي المجتمع كُله بقا بيحاول يساعد بعضه ،كُله بيشتغل بذمة وضمير وراضي باللي هو فيه وهيبدأ الإنتاج يزيد ، هنلاقي الفقير مبسوط والغني بيساعد باللي بيقدر عليه ،هنتحول لمجتمع بيحب بعضه ، مافيش حقد أو غِـل ، كُلنا هنخـاف على بعض ،كُلنا هنساعد بعض ، كُلنا هنطور بعض علشان نكون أحسن  ..
حاجات بسيطة في حياتنا لكـن رغم بساطتها مش قادرين نطبقها ، خايفين يتقال علينا مستسلمين للواقع ، وبندي أكتر ما بناخد ؛ لكـن بالعكس الحـياة هتكون أفضل ، العُمـر اللي كان بيضيع في الخـوف من اللي جاي والزعل على اللي راح ، هيتحول لعُمـر جديد بنفكر فيه صح وبنستغله بشكل أفضل ، هنعرف إزاي نعيش صح رغم كُل الظروف اللي بنمر بيها سواء كانت سهله أو صعبه ، وهـ نِدي طعمـ لُكل موقف بنساعد بيه من غير ما نكون مستنين مقابل  ..
نِـفسي إن الرضا يتحـول لفيروس يوصل لكل واحد بالعدوى ، يترسم بفُرشة وألوان زي الزهور اللي بتتفتح كل يوم مع كُل إطلالة للشمس ..
الحـياة محتاجة مِننا نعيشها صح ، نعيشها بـأمل ، نعـيشها برضــا ...
إفتــح شباك قلبك للحياة ، بُص على عصافير الجنة في عيونك لو قـلت الحمد لله ، ورضيت باللي ربنا كتبه ليك ، لإن في الآخر ده مقدر ومكتــوب ، عيد ترتيب حياتك ، بُصلها بزاوية تانيه ، إعدلها يمكـن تكون شايفها بالمقلوب ، فَكـر في كُل لحظـة عدت منك في القلق ياترى استفدت مِنها ! أكيد لأ ، طب ما تيجي تجـرب تفرح ، ما تيجي تجرب تصحى من النـومـ وترسم ابتسامه على وشك ، وتتفائل وتقول يارب ، ما تيجي نصالح نفسنا ، علشان نصالح كل حاجة في حياتنا وتصالحنا الظروف ، تعالوا نِعمل زي الناس الراضيين ونجرب إحساسهمـ ، اعتقد مش هياخد مِننا كتــير .
ارضــوا وجـربوا والمحـاولة هي أول طريق لتحقيق معادلة السعادة ^^
ربنـا يسـعد حياتكمـ ويملاها رضا بالحـال وراحـة بال ...
 ----------------------------
الناس الراضين

بقلمي : ابتسامـ مُصطفى

1 التعليقات:

موناليزا يقول...

اللهم ارزقنا الرضا

إرسال تعليق

Template by:

Free Blog Templates

;
Source : http://fr3st.blogspot.com/2012/05/add-shareaholic-sassy-bookmarks-to.html#ixzz1vjUMqRHf